- صحاب الباك جيت نشارك معاكم تجربتي (الضمير المستعمل "هي" بسبب نسخ لصق المهم)
1-المواد الثانوية 🧐👇
المواد لي نقدر نقلك كيفاش قريتهم :
- الإسلامية تحصلت على 20 والحمد لله . مكانش عنندي برنامج كنت نحفظ قبل الفروض و الإمتحانات فقط منبعد كي تبقى شهرين بديت عادي كنت نحفظ من تع الأستاذة و كان عندي pdf تع بوسعادي كنت مين داك نضرب طلة عليه لأنو سعات نلقى حوايج مكانش عند الأستاذة و العكس صحيح + كان عندي pdf واحد آخر لبوسعادي فيه أسئلة إستنتاجية ضربت طلة خفيفة برك عليه بصح عجبني و ركزي مع الأستاذ تاعك + اذا لقيتي صعوبة في كش درس كيما الميراث والربا توجهي لليوتيوب او كاين شمس الدين و بوسعادي مع أني مقريتش المادة هذي من اليوتيوب ماعدا درس الربا قريتو من عند شمس الدين إحتياط فقط .
اللغة العربية تحصلت على 17 والحمد لله : عام كامل نقطي محصورة بين 8-10 لأني كنت من راجعهاش سواء فروض أو إمتحانات وكي تبقى شهر لقيت روحي 0 فيها ومعلباليش وش نقرا اصلا لكن الحمد لله لقيت الأستاذ خالد حماش -ربي يجازيه خير- داير مراجعة شاملة ايا قريتها كاملة روعة كانت أول مرة نراجع فيها العربية كيما هكيك كنت داير بلاك 2 سوايع في النهار لمدة أسبوع نتفرج عليه ونكتب وش يكتب + حليت بعض الأجزاء من لي باك لي فاتو يعني كي كملت الإعراب إختبرت روحي كنت نروح لسوجي نعرب الكلمات فقط وهكذا لكن وحدها متكفيش + كان عندي كتاب لحيقون شريتو بعشرة آلاف 😁 في نوفمبر قريتو في جوان 😅 بلاك اسمو النوابغ - المهم عجبني بزاف خير من كتاب خالد حماش قريتو كامل - لأنو العربية مش دروس فقط أي أسئلة تتكرر في الباكات و كل واحد وكيفاش تجاوب عليه و هذو كانو في الكتاب هذا .
الإجتماعيات تحصلت على 14.5 والحمد لله : و عدم تحصلي على +19 راجع الى أني بديت نحفظ في الشهر الأخير . مكنش علبالي وش نقرا اصلا . قريت مع أستاذة تعرفني كانت تخليني ننعس معاها 😅 لأنها تعرفني أني رح نقرا فيما بعد 😁 وهذا الشي لي ممليحش لأني مكنت فاهم والو ومكنتش نحفظ للفروض والاختبارات + مكانش عندي دروس 😬 و لكن من رحمة الله بنا الأستاذ بورنان -ربي يجازيه خير- أطلق كتاب في أواخر شهر أفريل (ملخص الملخص هه) قال خصيصا لإنقاد الناس لي كيفي 🤣 مكانش غالي بزاف + مفيش بزاف صفح دار غير وش نحتاجو لأنو كيما علبالكم كانت كورونا و نقصونا ..الخ
- في الباك جاوبت 50% حفظ 50% فهامة ونظن هذا السبب لي حرمني من العلامة الكاملة رغم أني جاوبت على كلش .+ المنهجية اي كيانة في اليوتيوب كيما طريقة كتابة فقرة و تعليق و رسم ...الخ كاين بورنان كاين وحد الجان نسيت إسمو المهم ام مشهورين + حاول تفهم الدرس وتحفظو بش مضيعش خلاص + متخليش للشهر الأخير خاصة إذا كنت كيما أنا جامي قريت ببرنامج 🤣 غير خبط عشواء وهذي مش حاجة مليحة
(لأني مكفانيش الوقت بش نحفظ كلش والله النقطة هذي ديتها لأنو ربي كاتبهالي نديها نديها لحكمة يعلمها هو على خاطر الدرس لي حفظتو طاح والدرووس لي محفظتهمش مطاحوش سبحان الله .
الفلسفة ديت 7 🤣: بصح نقلكم اي من أسهل المواد متخلعكم في الدرس ميخلعوكم لي مداوش ويقولو قرينا لأنو كي يقرب الباك رح يديرو مقترحات لكل شعبة حوالي 5 مقالات أحفظهم بصحتك أنا راسي كان خشين كان عندي pdf تع الأستاذ خليل سعيداني -ربي يجازيه خير - ايا أنا من الخمسة مقالات خيرت زوج كتبتهم بيدي لأنو هكيك أحسن (مشريتش لكتاب تاعو) مهم حفظت منهم قيس ندي 10-11 هه مكانش عندي الوقت لأنو هذا الشئ صرا في الشهر لخر 🤣 - ايا منبعد الأستاذ هذا حط الإقتراحات بالترتيب يعني شكون لي عندها إحتمالية كبيرة طيح وكانت مقالة الفرضية لي مكتبتاهش اصلا وعجزت ختي تقلي اقراها اي هي لولة وانا نقلها نن نقرأ لي كتبتهم وخلي تخلى . وخلات صح 🤣🤣 مهم هذي المقالة طليت عليها قبل مندخل الباك تاعها بنص ساعة 😅 و لمدة 10 دقايق قريتها برك و فهمت علواش تحكي يودي كي طاحتنا هي طحت نخرط ونضرب من راسي حسيت روحي فيلسوف الأمثلة والأقوال والشغل أكل من عندي 🤣🤣 الورقة لي مدوهانا ختمتها ونظن الناس لي تقلك قريت و عمرت الورقة هي نفسها الناس لي كيفي لي عمروها خريط و قراو مقالات خلاف أصلا و الله أعلم . المهم ركزو على المنهجية أو كاينة في اليوتيوب أنا قريتها من عند "خليل سعيداني + دروس الي حفظتهم " ونظن ال 7 لي ديتها كانت على المنهجية ومتخافو موالو ساهلة تقتل .
-ملاحظة : مديروش كيما درت أنا وتخليو للشهرلخر 🙄 هاتولهو ني هدرت
- لا تنسو عدم القيام بالعادات السيئة التي قمت بها و ندمت عليها فهذا المنشور من أجل تحذيركم لا تحفيزكم على الأخطاء:
- يجب المتابعة مع الأستاذ و كتابة الدروس و المشاركة و الإهتمام بنقاط الفروض و الاختبارات لتقييم مستواك و مدى تقدمك اتمنى ان تستفيدوا .